У Астраўцы 18 снежня адкрыецца рэзідэнцыя Дзеда Мароза. Пра фармат і асаблівасці яе работы расказала намеснік дырэктара па асноўнай рабоце Астравецкага раённага цэнтра культуры і народнай творчасці Лаліта Хамкова:

– Галоўны чараўнік будзе прымаць маленькіх гасцей да праваслаўнага Ражаства па выхадных днях – у суботу і нядзелю – з 15.00 да 16.00. Рэзідэнцыя размесціцца ў раённым цэнтры культуры і народнай творчасці па адрасе: г. Астравец, вул. Карла Маркса, 39.

З-за эпідэмічнай сітуацыі традыцыйны фармат, калі на сустрэчу з Дзедам Марозам збіралася шмат дзетак, сёлета змяніўся: плануецца наведванне белабародага чараўніка невялікімі групамі па 10-15 чалавек. Кошт білета складае 5 рублёў.

Галоўны персанаж – сімвал надыходзячага года – Белы металічны Бык з іншымі чароўнымі героямі падораць дзецям сапраўдную казку. На свяце гасцей чакае фотазона, сувеніры, выстава дзіцячых малюнкаў і многае іншае.

Галоўнай асаблівасцю ўрачыстасці стане «Навагодняя пошта»: кожны зможа напісаць ліст Дзеду Марозу – і з ўпэўненасцю чакаць ажыццяўлення жадання ў Новым 2021 годзе.